ბოლო ორი დღის განმავლობაში, მედიასივრცეში და სოციალურ ქსელებში ცრუ ინფორმაცია გავრცელდა აჭარის ავტონომიური რესპუბლიკის ყოფილი ხელმძღვანელის, ასლან აბაშიძის გარდაცვალების თაობაზე. ამ ამბავმა საზოგადოებაში დიდი რეზონანსი გამოიწვია. გავრცელებული ხმების გადასამოწმებლად, აბაშიძის ოჯახის ახლობელს, უფლებადამცველ თამაზ ბაკურიძეს დავუკავშირდით. ბაკურიძე ამბობს, რომ ინფორმაცია სიმართლეს არ შეესაბამება და ასლან აბაშიძის ჯანმრთელობის მდგომარეობა სტაბილურია.
– ძალიან ახლოს ვარ ასლან აბაშიძის დასთან, ნარგიზ აბაშიძესთან, რომელიც ახლა ბათუმში ცხოვრობს. ჩემი ინფორმაციით, ბატონი ასლანის ჯანმრთელობის მდგომარეობა ამჟამად სტაბილურია, მაგრამ ბოლო დროს ცოტა დემენცია აწუხებს. ისეთი სიტუაცია არ არის, რომ ჩავარდნილი იყოს, ხანდახან მაღალი წნევებიც აწუხებს. 87 წლის არის და აბა რა იქნება.
– შვილი შეეძინა საქართველოდან წასვლის შემდეგ?
– დიახ, აქედან წასვლის შემდეგ ბიჭი შეეძინა, ალექსანდრე აბაშიძე, რომელიც ახლა 10 წლის არის. როდესაც მისი გარდაცვალების შესახებ ინფორმაცია გავრცელდა, უამრავმა ადამიანმა დამირეკა. მისი ოჯახის ახლობლებს გადავურეკე და არ დადასტურდა. შემდეგ მეორე დღეს ისევ გავრცელდა და ისევ გადავრეკე და ასევე არ დადასტურდა. არ ვიცი, ვინ ერთობა ამით. ალბათ საიტის რეკლამა უნდოდათ და დაწერეს.
– მეორე მეუღლე უვლის ხომ ალბათ?
– დიახ, მხოლოდ ის, მეუღლე და შვილი ცხოვრობენ სახლში და დრო და დროს რძალი, გიორგი აბაშიძის მეუღლე სალომე ბაჯელიძე სტუმრობს.
ასლან აბაშიძის ოჯახური ამბები
როგორც ცნობილია, 87 წლის ასლან აბაშიძე წლებია მოსკოვში ცხოვრობს. უფლებადამცველის მიერ ნახსენები უმცროსი ვაჟი, ალექსანდრე აბაშიძე, სწორედ რუსეთში შეეძინა. ის ამჟამად 10 წლისაა. ალექსანდრეს დედა, ანაიდა ოვკუმიანი, აბაშიძის მესამე მეუღლეა, რომელიც მათ ოჯახში ბათუმში მზარეულად მუშაობდა. აბაშიძე 78 წლის იყო, როდესაც მას მესამე შვილი შეეძინა.
აბაშიძეს გარდაცვლილ მეუღლესთან, მაგული გოგიტიძესთან, ორი შვილი – დიანა და გიორგი ჰყავს. ასლან აბაშიძის უფროსი ვაჟის, გიორგის ოჯახური ისტორია კი საკმაოდ დრამატულია.
გიორგი აბაშიძე 27 წლის ასაკში 17 წლის სალომე ბაჯელიძეზე დაქორწინდა 2003 წელს. მალე დატრიალებული ტრაგედიების (სალომეს მამის გარდაცვალება, გიორგის დედის, მაგული გოგიტიძის გარდაცვალება) გამო გამოწვეულ სტრესს წყვილმა ვერ გაუძლო და რვა თვეში დაშორდა.
მიუხედავად განშორებისა, მათ მეგობრული ურთიერთობა შეინარჩუნეს. სალომეს განსაკუთრებით უყვარდა მამამთილი, ასლან აბაშიძე, და მისი თხოვნით, მას ბაბუთი მიმართავდა. თერთმეტწლიანი დაშორების შემდეგ, 2015 წელს, სალომე და გიორგი შეურიგდნენ და ბათუმში იქორწინეს. ამჟამად წყვილს სამი შვილი: ტყუპი გოგონა და 2022 წელს დაბადებული ვაჟი ჰყავს. ასლან აბაშიძე შვილიშვილებთან ერთად გადაღებულ იშვიათ ფოტოებს პერიოდულად სწორედ მისი რძალი, სალომე ბაჯელიძე, ავრცელებს სოციალურ ქსელში.