32 წლის ახალგაზრდა კაცი, ვალერი მათიაშვილი თანასოფლელებმა გურჯაანი-ბაკურციხის შემოვლით გზაზე გარდაცვლილი იპოვეს. არსებული ინფორმაციით, მას ავტომობილი დაეჯახა, რის შემდეგ მძღოლი შემთხვევის ადგილიდან მიიმალა. ოჯახის წევრები ახალგაზრდას ეძებდნენ, რადგან სახლში არ დაბრუნდა. მოგვიანებით, ადგილობრივებმა გზაზე გარდაცვლილი ნახეს. ცოტა მოშორებით, გზის პირას იყო დაღუპულის ავტომობილი.
ვალერი მათიაშვილი გურჯაანის მუნიციპალიტეტის სოფელ კარდენახში ცხოვრობდა დედასთან და ძმასთან ერთად. გლოვაა მის სოფელში და ადგილობრივები ითხოვენ დამნაშავის გამოვლენას და დასჯას.
“ძალიან მძიმე ფაქტია მომხდარი. გარდაცვლილია ვალერი მათიაშვილი, ძალიან კარგი ახალგაზრდა. ადრე დაობლდა, ძმებს მამა გარდაეცვალათ და დედამ ობლობაში გაზარდა. ორივე ძალიან, ძალიან მშრომელები არიან. დედას მხარში ედგნენ. ვალერი მექანიზატორი იყო, ტრაქტორზე მუშაობდა, 32 წლის, უაღრესად კეთილი და პატიოსანი, მლოცველი, მართლმადიდებელი ბიჭი იყო. აბსოლუტურად ყველაფერი, რაც შეიძლება დადებითი თქვა, ეს შემიძლია გითხრათ მასზე. ყველას უყვარდა სოფელში. ფიზიკურად შრომობდა, ტრაქტორით დადიოდა შეწამვლაზე, მრავალწლიან კულტურებზე, საჭიროებისამებრ ემსახურებოდა მომხმარებელს.
მართლაც ძალიან კარგი ადამიანი აღარ არის. რა მოხდა, ამაზე ჯერჯერობით არ გვაქვს ზუსტი ინფორმაცია. სოფელში როგორც საუბრობენ, დილით გავიდა სავარჯიშოდ, ყოველ დილას დარბოდა, ჯანმრთელობის გამო, ფიზიკურად ვარჯიშობდა, რომ ფორმაში ყოფილიყო – ძლიერი ბიჭი იყო, ძალიან მოწესრიგებული ყველანაირად.
ყველას უყვარდა სოფელში და დღეს ყველა განიცდის ამ ტრაგედიას. თავისი მანქანით იყო წასული, მერე მანქანა გაუჩერებია და ფეხით, ძუნძულით დარბოდა ნელ-ნელა დილით, როგორც ხდება ხოლმე. იმ დილით, ვარჯიშის დროს, შემოვლით გზაზე, ბაკურციხე-წნორის მიმართულებით სავარაუდოდ, ამ შემოვლით გზაზე დაეჯახა მანქანა. დანარჩენი ინფორმაცია ამ ეტაპზე არა მაქვს. სავარაუდოდ, შეჯახების შედეგად არის გარდაცვლილი. რაიმე სხვა საგნით დაზიანება სხეულზე მას არ აღენიშნება. ექსპერტიზაც ჩატარებულია, გამოძიება დაწყებულია და გაირკვევა ყველაფერი.
გზაზე უპოვიათ გარდაცვლილი თანასოფლელებს. დანარჩენი არაფერი ვიცით, კიდევ ერთხელ ვუსამძიმრებ ოჯახს. ახლა აქ ვარ ოჯახში სამძიმარზე მოსული და ყველა განიცდის. ძალიან დიდი ტრაგედიაა ახალგაზრდა კაცის სიკვდილი. ჩართულები არიან შესაბამისი უწყებები და რა თქმა უნდა, გამოვლინდება დეტალები, გაირკვევა რაც მოხდა”, – ამბობს ჩვენთან საუბარში მერის წარმომადგენელი სოფელ კარდენახში.
ყველა ძალიან განიცდის მომხდარს. სოციალურ ქსელში თანასოფლელები ემშვიდობებიან ახალგაზრდას. წერენ, რომ დამნაშავე შემთხვევის ადგილიდან მიიმალა და მის გამოვლენას და დასჯას მოითხოვენ.
“სამწუხაროა, როცა სოფელს ასეთი ახალგაზრდა აკლდება. თქვენ არ იცით როგორი უწყინარი, კეთილშობილი, შრომისმოყვარე ბიჭი იყო. ღიმილიანი მისალმება იცოდა, სალამს ვერ დაასწრებდი. მთელს სოფელში გლოვაა ახლა. როგორ უნდა გაიხაროს მისმა მკვლელმა, უფალი ამას არ აპატიებს. კარგი, ვთქვათ შემთხვევით მოხდა, დაეჯახა მანქანა, მერე სად გარბოდა, როგორ მიატოვა ძირს დაგდებული ახალგაზრდა ბიჭი? იქნებ შველა შეიძლებოდა, იქნებ ცოცხალი იყო ძირს რომ დაეცა, დაგდებული შეიძლება შველას ითხოვდა, როგორ მიატოვა და ახლა როგორ დადის ამ ცოდვით. იმედი მაქვს, დამნაშავეს გამოავლენს პოლიცია და დაისჯება საკადრისად. ახლა მივდივარ სამძიმარზე და როგორ ვუთხრა მის უბედურ დედას სამძიმარი?.. აღარ ჰყავს ობლად გაზრდილი შვილი. სად გარბოდა დამნაშავე, იქნებ საშველი იყო. საერთოდ, როგორ უნდა იცხოვროს, როცა იცის, რომ ახალგაზრდა ბიჭი მოკლა”, – ამბობს ჩვენთან საუბარში ადგილობრივი.
კიდევ ერთ მეგობარს გავესაუბრეთ. მას ძალიან გაუჭირდა ვალერიზე საუბარი.
“სიტყვებს თავს ვერ ვუყრი. ჩემი მეგობარია ვალერი. უზომოდ კეთილი იყო, ყველას გვერდში დგომა იცოდა, არავის გამო უკან არ დაიხევდა. არ იყო დაოჯახებული, სამომავლო გეგმებს აწყობდა და ასეთი ტრაგედია მოხდა. როგორც ყველა, სულ წვალობდა, შრომობდა.
ძალიან მიჭირს მასზე წარსულში საუბარი.ძნელია, თვალწინ მიდგას ჩვენი ბავშვობა, ერთად გატარებული წლები. მამა არ ჰყავს, თვითონ ინახავდა ოჯახს. როგორ არ მინდა დავიჯერო… ისიც არ ვიცით ჯერჯერობით, ზუსტად რა მოხდა. სოფელში ბევრი ვერსიაა, მაგრამ ამ ვერსიებზე მე ვერ ვისაუბრებ. გამოძიება მიდის და გაირკვევა სიმართლე. მართლა ძალიან მტკივა გული. სულ გვემახსოვრება ჩვენი ვალერი”, – ამბობს მეგობარი.
ფაქტზე გამოძიება მიმდინარეობს, ცხედარს ექსპერტიზა უკვე ჩაუტარდა. მეტ დეტალს სამართალდამცველები ალბათ დაადგენენ.
admin