ტრაგედია დომინიკის რესპუბლიკაში – დედაქალაქში არსებულ ერთ-ერთ ღამის კლუბში, კონცერტის მიმდინარეობისას სახურავი ჩამოინგრა.
არსებული ინფორმაციით, დაიღუპა 100-მდე ადამიანი, დაშავდა 200-ზე მეტი.
კლუბ Jet Set-ის სახურავი მაშინ ჩამოინგრა, როდესაც მომღერალ რუბი პერესის კონცერტი მიმდინარებდა. რამ გამოიწვია ნგრევა ჯერჯერობით გაურკვეველია. თავად პერესი უკვე ამოყვანილია ნანგრევებიდან და სტაბილურ მდგომარეობაშია.
დაღუპულთა შორის არის ცნობილი ბეისბოლისტი ოქტავიო დოტელი. მაშველებმა ის ნანგრევებიდან ამოიყვანეს, თუმცა საავადმყოფოსკენ მიმავალ გზაზე გარდაიცვალა.
ტრაგედიის ადგილზე ქვეყნის პრეზიდენტი ლუის აბინადერი მივიდა და დაღუპულთა ოჯახებს მიუსამძიმრა.
8 აპრილის ღამეს, სანტო დომინგოში მდებარე ღამის კლუბ Jet Set – ის სახურავი მოულოდნელად ჩამოინგრა ცნობილი მომღერლის რუბი პერესის კონცერტის დროს.
მუსიკოსის ქალიშვილის თქმით, მამამისიც ნანგრევების ქვეშ მოყვა, მაშველებმა მისი პოვნა ჯერ ვერ შეძლეს.
ადგილობრივი მედია იუწყება, რომ ნგრევის დროს ღამის კლუბში დაახლოებით ათასი ადამიანი იქნებოდა.
სამაშველო სამსახურის დირექტორის, ხუან მანუელ მენდესის თქმით, დაღუპულთა რიცხვი შეიძლება კიდევ გაიზარდოს. მისი თქმით, ნანგრევების ქვეშ ჯერ კიდევ ბევრი ადამიანია.
რუბი პერესის კონცერტზე იმყოფებოდნენ:პოლიტიკოსები, სპორტსმენები და სხვა ცნობილი სახეები.
დაღუპულთა შორის არის მონტე კრისტის პროვინციის გუბერნატორი ნელსი კრუზი, რომელიც მიყენებული დაზიანებების შედეგად საავადმყოფოში გარდაიცვალა.
სახურავის ჩამონგრევამდე ცოტა ხნით ადრე კლუბში გადაღებულ ვიდეო კადრებში ჩანს ხალხი, რომლებიც სცენის წინ მაგიდებთან ზის, ზოგი კი ცეკვავს.
სოციალურ ქსელში გამოქვეყნებულ ერთ-ერთ ვიდეოში ისმის, რომ ვიღაც სახურავზე მიუთითებს და ამბობს, რომ ჭერიდან რაღაც ჩამოვარდა. ვიდეოში ასევე ჩანს, რომ რუბი პერესი იმავე მიმართულებით იყურება, საითაც მაყურებელი მიუთითებდა.
30 წამზე ნაკლების შემდეგ ისმის ძლიერი ხმაური, რის შემდეგაც ვიდეოში ჩანს მხოლოდ შავი ფონი. ისმის ქალის ხმა: “მამა, რა დაგემართა?”
როგორც რუბი პერესთან ერთად გამომსვლელმა ერთ-ერთმა მუსიკოსმა განუცხადა ადგილობრივ მედიას, სახურავი ჩამოინგრა 8 აპრილს, ღამის 1-ელ საათზე. ”მეგონა, მიწისძვრა იყო”, – თქვა მან.
დომინიკის რესპუბლიკა კარიბის ზღვის აუზის ერთ-ერთი ყველაზე პოპულარული ტურისტული ქვეყანაა. გასულ წელს, ქვეყნის ხელისუფლების ინფორმაციით, მას დაახლოებით 11 მილიონი ტურისტი ეწვია.
ქვეყანაში სამდღიანი გლოვა გამოცხადდა.