ფემიციდის კიდევ ერთი უმძიმესი ფაქტი თბილისში, ზემო ფონიჭალაში მოხდა. 37 წლის მამაკაცმა 34 წლის ცოლს ბლაგვი საგნით არაერთი დაზიანება მიაყენა, რის შედეგადაც ქალი სამწუხაროდ ადგილზე გარდაიცვალა, დამნაშავე კი შემთხვევის ადგილიდან მიიმალა, თუმცა პოლიციელებმა ბრალდებული მალევე დააკავეს.უწყებამ მომხდარის დეტალებზე ინფორმაცია უკვე გაავრცელა.
“შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, ოჯახის წევრის მიმართ ჩადენილი განზრახ მკვლელობის ბრალდებით 1987 წელს დაბადებული ნ.ქ. დააკავეს. დანაშაული 20 წლამდე ან უვადო თავისუფლების აღკვეთას ითვალისწინებს. გამოძიებით დადგინდა, რომ ბრალდებულმა მიმდინარე წლის 25 აგვისტოს, თბილისში, საცხოვრებელ ბინაში, ურთიერთშელაპარაკების ნიადაგზე მეუღლეს – 1991 წელს დაბადებულ ა.კ.-ს, ბლაგვი საგნის გამოყენებით მრავლობითი დაზიანება მიაყენა და შემთხვევის ადგილიდან მიიმალა. მიყენებული დაზიანებების შედეგად ახალგაზრდა ქალი შემთხვევის ადგილზე გარდაიცვალა. სამართალდამცველებმა ჩატარებული საგამოძიებო მოქმედებების შედეგად, ბრალდებული დანაშაულის ჩადენიდან მალევე დააკავეს. გამოძიება სისხლის სამართლის კოდექსის 109-ე მუხლის “კ” ქვეპუნქტით მიმდინარეობს, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობას გულისხმობს,” – წერია განცხადებაში.
როგორც ირკვევა ამ შემზარავ ფაქტს მცირეწლოვანი შვილები შეესწრნენ. მკვლელობაში ბრალდებული მამაკაცი ნიკოლოზ ქრისტესაშვილია.
“შოკირებული ვარ მომხდარით. ალინას დიდი ხანია პირადად ვიცნობ და დანამდვილებით შემიძლია გითხრათ, რომ სიფრიფანა, ძალიან კარგი, საყვარელი, საოცრად მოწესრიგებული, ყურადღებიანი, თბილი გოგო და არაჩვეულებრივი დედა იყო. ორ პატარას ზრდიდა და თან ჰყვებოდა თავის შვილებს,ზრუნვას არ აკლებდა. ძალიან პატარები არიან მისი შვილები, ბაღში დაჰყავდა როგორც ვიცი. გავიგე, რომ ბავშვები შეესწრნენ ამ ამბავს და წარმომიდგენია მათი მდგომარეობა როგორი იქნება. მართლა ძალიან განვიცდი მომხდარს. მის ქმარსაც ვიცნობდი, რამდენჯერმე მყავს ნანახი, არ ტოვებდა ცუდი ადამიანის შთაბეჭდილებას. რა ხდებოდა მათ ოჯახში ეს დეტალები მართლა არ ვიცი. ნიკოლოზ ქრისტესაშვილია მისი ქმარი, მას მოუკლავს ალინა. სხვა დეტალები არ ვიცი. ამ თვეში უკვე მესამე შემთხვევაა ფემიციდის, ასე რატომ ექცევიან ოჯახი წევრები ერთმანეთს? როგორ გაწირა ეს გოგო და მისი ლამაზი შვილები დააობლა. ძალიან მიჭირს ამის გააზრება. ძალიან მეცოდება ალინა”, – ამბობს მისი ახლობელი.
ფაქტზე გამოძიება დაწყებულია. რა ჩვენება მისცა თავად ბრალდებულმა გამოძიებას ეს მოგვიანებით გახდება ცნობილი. ტრაგედიის ადგილას საგამოძიებო მოქმედებები უკვე დასრულებულია. ცხედარს ექსპერტიზა ჩაუტარდება.