61 წლის ასაკში გარდაიცვალა ბიზნესმენი და პოლიტიკოსი ლევან გაჩეჩილაძე. ინფორმაციას გაჩეჩილაძის ოჯახის ახლობლები ადასტურებენ.
ლევან გაჩეჩილაძე იყო საქართველოს მეხუთე და მეექვსე მოწვევის პარლამენტის წევრი. არჩეული იყო მეშვიდე მოწვევის პარლამენტშიც. იყო ოპოზიციის კანდიდატი საქართველოს პრეზიდენტის პოსტზე 2008 წლის არჩევნებზე.
1986-1987წწ. იყო თბილისის სახელმწიფო უნივერსიტეტის ეკონომიკის კათედრის ლაბორანტი; 1987-1999წწ. ეწეოდა ბიზნეს საქმიანობას:1988-1990წწ. ფირმა “ლილოს” კომერციული აგენტი; 1991-1992წწ. სპორტის დეპარტამენტის კომერციული განყოფილების უფროსის მოადგილე; 1994 წელს დააფუძნა კომპანია “Georgian Wines and Spirits”(GWS).
1999-2002წწ. საქართველოს მე-5 მოწვევის პარლამენტის წევრი: საქართველოს მოქალაქეთა კავშირის პარტიული სიით, აგრარულ საკითხთთა, მთიანი რეგიონებისა და განსახლების კომიტეტის წევრი; 2002-2003წწ. ქ. თბილისის საკრებულოს წევრი, ფრაქცია “ახალი მემარჯვენეები” (ახლები);
2004-2008წწ. საქართველოს მე-6 მოწვევის პარლამენტის მაჟორიტარი დეპუტატი N2 ვაკის საარჩევნო ოლქიდან, პ/გ “ახალი მემარჯვენეები” (ახლები), საფინანსო-საბიუჯეტო კომიტეტის წევრი; საქართველოს მე-7 მოწვევის პარლამენტის წევრი: პარტიული სიით “გაერთიანებული ოპოზიცია (ეროვნული საბჭო-მემარჯვენეები)” (2008); 2008 წლის საპრეზიდენტო არჩევნებზე იყო გაერთიანებული ოპოზიციის კანდიდატი საქართველოს პრეზიდენტის პოსტზე, მიიღო ხმათა 25.7%. 1999 წელს მიღებული აქვს “წლის ბიზნესმენის წოდება”.