“ტრაგედია იმ დროს მოხდა, როცა დათო ბაზარში მიდიოდა, ბინა იყიდა და უნდა აღენიშნა… ნანგრევებში მისი სხეულის ნაწილები იპოვეს” – რას ჰყვებიან ვაგზალზე დაღუპულ ბიჭზე

თბილისში, სადგურის მოედნის მიმდებარედ, ერთ-ერთ საცხოვრებელ კორპუსში მომხდარ ნგრევას ორი ადამიანი ემსხვერპლა, ერთი კი დაშავდა. ტრაგედია 14 ივლისს, დაახლოებით, 19:00 საათზე, თევდორე მღვდლის ქუჩაზე მოხდა. დაღუპულია დავით ბართია და კიდევ ერთი ქალბატონი, რომელიც იქვე ვაჭრობდა. დავით ბართია იმ დღეს დასთან ერთად ბაზარში ხორცის საყიდლად მიდიოდა, როცა ნანგრევებში მოყვა. მისი დანაწევრებული ცხედარი მაშველებმა ნანგრევებიდან ამოიყვანეს, მისი და კი მოტეხილობებით კლინიკაშია გადაყვანილი. გლოვაა მარტვილის რაიონის სოფელ ბალდაში, სადაც დათო ბართია გაიზარდა. დღეს მისი ჭირისუფალია მთელი სოფელი.

ნანი ბართია, დათოს მეზობელი:

– მთელი სოფელი გლოვობს, საშინელი ტრაგედია დატრიალდა, ჩვენი დათო აღარ გვყავს და მთელი სოფელია დღეს მისი ჭირისუფალი, რადგან დათოს დედ- მამა გარდაცვლილები არიან. დათო უკარგეს ოჯახში გაიზარდა. მის მშობლებს ის აყვანილი ჰყავდათ, თავს ევლებოდნენ, არაფერს აკლებდნენ. ჩემი შვილის ტოლია და ახლაც მახსოვს, სახლში თოთო ბავშვი რომ მოიყვანეს, როგორ მყავდა ხელში ატატებული. მას შემდეგ ჩვენ თვალწინ გაიზარდა. მამამისი იმ წლებში ბალდაში ფერმის გამგე იყო. დედა მეოჯახე ქალბატონი იყო. ძვირფასი ოჯახის გაზრდილი შვილია…

დათო საუკეთესო შვილი იყო, წესიერი, ზრდილობიანი, უმაღლესი განათლებით, უჭკვიანესი, სოფლის იმედი… ხუთი წელი იქნება, რაც წასულია თბილისში, ჯერ ე.წ დეზერტირების ბაზარში მუშაობდა, ფიზიკურად შრომობდა, მერე გაზის კომპანიაში აღმრიცხველად დაიწყო მუშაობა. დედა 6 წელია, რაც გარდაცვლილია, მამა უფრო ადრე გარდაიცვალა. ბიოლოგიურმა დამ მოძებნა წლების წინ, რომელიც სულ ცდილობდა, მის გვერდით ყოფილიყო, სულ ძამიკო, ძამიკოს ეძახდა. რაც ნახა, მას შემდეგ თვალიდან არ მოუშორებია.

გუშინაც დასთან ერთად იყო. ბაზარში ორივე ერთად ხორცის საყიდლად მიდიოდნენ, თურმე. სამი დღეა, რაც ბინა იყიდა და- ძმამ, სანახევროდ და უნდა აღენიშნათ. ამ დროს დატრიალდა ეს თავზარდამცემი ამბავი. მთელმა სოფელმა გავათენეთ წუხელ, იქ, თბილისში ბიჭები დასტრიალებენ თავს. ჯერ პროზექტურაშია მისი დასახიჩრებული ცხედარი და ველოდებით, როდის ჩამოსვენებენ. ჩემი ბიჭი არ არის საქართველოში და იქიდან დასტირის. ჩემს შვილებთან ერთად გაიზარდა. არაფერი დარჩა. ნანგრევებში იპოვეს მისი სხეულის ნაწილები, ამის გააზრებაც მიჭირს. დნმ-ით უნდა დადგინდეს, რომ დათოა. მისი და შეესწრო ამ ფაქტს, ისიც დაშავდა, ფეხი აქვს მოტეხილი, ძამიკო, ძამიკოო, იძახდა. მან ჯერ არ იცის, რომ ძმა გარდაცვლილი ჰყავს.

ემოციურად ემშვიდობება დათო ბართიას კიდევ ერთი მეზობელი, ჟურნალისტი დალი ბჟალავა: “ერთი გარდაცვლილის ვინაობა ცნობილია… ჩემი მეზობელი, დავით ბართიაა. დღეს ეს სიტყვები თითქოს ჩვეულებრივ სტატისტიკად იქცა ჩვენს რეალობაში. ციფრების უკან კი ადამიანები დგანან… ისტორიები…ტკივილი…სიცოცხლეები, რომლებიც აღარასდროს გაგრძელდება. ამ ტრაგედიის უკან გაუბედურებული ოჯახებია, ის ოჯახები, სადაც დილით უვნებელი გავიდა ვიღაც სახლიდან, ჩვეულებრივი დღის საყიდლებზე და ვეღარ დაბრუნდა…

ერთი გარდაცვლილის ვინაობა ცნობილია… ასეთი იყო ჩემი დღის ბოლო ნიუსი ჩემი მეზობელი, დავით ბართია – სადგურის მოედანზე ჩამონგრეული შენობის ნანგრევებში მოყვა და დაიღუპა. ის ჩვეულებრივი გამვლელი იყო, რომელიც სიხარულით გულანთებული გამოვიდა იმ დღეს სახლიდან… როგორც თქვეს, დათოს სამი დღის წინ ბინა შეუძენია. ხომ წარმოგიდგენიათ, რამხელა სიხარულით და ბედნიერებით სავსე მიიჩქაროდა საყიდლებზე – გეგმებით, ოცნებებით… და ვერაფრით წარმოიდგენდა, რა ელოდა. სად ეცალა მას ახლა სიკვდილისთვის?! იმ დღეს ის ახალ ბინაში უნდა დაბრუნებულიყო – ახალი ცხოვრების დასაწყებად, ბედნიერებით სავსე… მაგრამ ვეღარ დაბრუნდა. დათო, ახლად ნაყიდ სახლში უნდა დაბრუნებულიყო იმ დღეს – ახალ ცხოვრებაზე, ოცნებით სავსე და თავის ახალ სახლში ბედნიერი ცხოვრება უნდა გაეგრძელებინა.. არ ვიცი, ვინ დგას დათო ბართიას ტრაგედიის უკან. მაგრამ ვიცი – დათოს აღარავინ ელოდება სოფლის სახლში… ვერც დედა ჩამოიღებს ცას კივილით.. ვერც მამის ღრიალი შეძრავს სამყაროს… ორივე მათგანი დიდი ხანია, იმიერ სამყაროში არიან. როგორი სამწუხარო და სულის შემძვრელია, რომ ასე ნაადრევად და ტრაგიკულად დათოც იმ გზას დაადგა.

მას თითქმის არავინ ჰყავს… (ოჯახის წევრებს ვგულისხმობ). დარჩა მხოლოდ სოფელი — დათოს მონატრებული სოფელი… და ახლა მთელი სოფელი ელოდება დათოს. სოფელი, სადაც ყოველი ეზოდან ნამტირალევი ხალხი გამოდის… სოფელი, სადაც დათო ყველას ახსოვს – ბავშვობიდან, პატარა, ქერათმიანი, ხუჭუჭა ბიჭი, ვისაც ოდესღაც ხელში აყვანილი დაჰყავდათ. დათოსთვის იქ ყველაფერი მშობლიურია, იქ მისი ბავშვობაა, იცის, რომ იქ ყველას უყვარს და ყველას სტკივა მისი ტკივილი. მის მოლოდინში ახლა იქ მდუმარება იქნება ისეთი, რომ ფოთლების შრიალიც კი ტკივილივით გაისმება. სოფელი იტირებს დათოს ისე, როგორც საკუთარ შვილს – გულით, მთელი ტკივილით, დათოს სული ალბათ იგრძნობს, რომ არ დარჩენილა მარტოდ. სოფელი გახდა მისი უკანასკნელი ოჯახი, უფალმა დაგიმკვიდროს სასუფეველი”, – წერს ჟურნალისტი დალი ბჟალავა.

დათო ბართიას ბიოლოგიური და, 49 წლის ქალი მრავლობითი ტრავმებით კლინიკა “გლობალმედში” იმყოფება. მეორე გარდაცვლილი ქალბატონია, მანანა დარახველიძე. ის, თურმე, იმ შენობის წინ ვაჭრობდა.

“ტრაგედია, რომელიც ჩემს ოჯახს დაატყდა თავს, მტერს არ ვუსურვებ! კახი კალაძე, თბილისის მერია, როგორ გძინავთ ღამე ამდენი ხალხის ცოდვით! დეიდაჩემი, (დედაჩემის და) მანანა დარახველიძე ტონიანი სინკარების ქვეშ მოყვა და ადგილზე გარდაიცვალა. არ შევაწუხო არავინო და ყინვასა თუ სიცხეში, იდგა თავის პატარა მაღაზიაში, დღეში 20 ლარის გულისთვის! ოცნებად ჰქონდა, წელიწადში ერთხელ მაინც ჩასულიყო რაჭაში, თავის პატარა სახლში და როგორც თვითონ იტყოდა, ფულს მაგისთვის აქუჩებდა, მთელი წლის განმავლობაში! ერთი გაფრთხილება, ერთი პატარა შემორაგული ხის ბარიერი აგვაცილებდა ამ ტრაგედიას თავიდან! როდემდე უნდა გვეშინოდეს სახლიდან გასვლის! სიცოცხლით სავსე, ჯანმრთელი წავიდა დღეს სამსახურში და ახლა მორგში წევს! ვინც მიცნობს, „პანიკიორი“ ხარ, ყველაფრის გეშინიაო, მეუბნებიან! დიახ, მეშინია ბავშვის მაღაზიაში გაგზავნის, იმაზე ფიქრით, რომ არანორმალური სიჩქარით მომავალმა მანქანამ არ გადაუაროს (რამდენიმე წლის წინ სახლში შემომივარდა მანქანა), მეშინია იმაზე ფიქრის, რომ ჩემი მშობლების 16-სართულიან სახლში ლიფტი არ ჩაწყდეს და კიდევ არ აფეთქდეს კორპუსში გაზი, რომლებმაც 2019 წელს კინაღამ მთელი ჩემი ოჯახი შეიწირა! დღეს კი ეს ტრაგედია! იმას აღარ დავწერ, თუ როგორ გვეპყრობოდნენ ჭირისუფლებს, ნორმალურ ქვეყანაში, ალბათ, ჩემს 76 წლის დედას, რომელიც ცოცხალ-მკვდარი, 7 საათიდან ბორდიურზე იჯდა, ათასი ფსიქოლოგ-რეაბილიტოლოგი ეხვეოდა თავს! ისინი კი ძაღლადაც არ გვაგდებდნენ, ათასი ხვეწნის მიუხედავად რამე მაინც ეთქვათ ჩვენთვის! კახი, კარგია მილანში საშოპინგოდ სიარული, დეიდაჩემიც არ იტყოდა უარს, მაგრამ ხანდახან მაინც გაიარე ვაგზლის მოედნის მიდამოებში და ნახე, ხალხი როგორ პირობებში მუშაობს ლუკმა-პურისთვის! და როგორც ჩანს, თავსაც სწირავს ამისთვის! სიცოცხლით სავსე ქალაქში ვცხოვრობთ არა?!” – წერს მაია კობაიძე სოციალურ ქსელში.

როგორც ცნობილია, აქ მაცხოვრებლების ნაწილი დიდი ხანია, ითხოვდა გასახლებას, რადგან სახლი ავარიული იყო. თბილისის მერის მოადგილის, ირაკლი ბენდელიანის თქმით, შენობას ავარიულობის მესამე ხარისხი ჰქონდა მინიჭებული (საცხოვრებლად საშიში) და მაცხოვრებლებთან მიმდინარეობდა კომუნიკაცია შენობის დაცლაზე, თუმცა ყველა მათგანისგან თანხმობა ვერ მიიღეს. თბილისის მერიის ინფორმაციით, კორპუსის მობინადრეებს დროებით სასტუმროში განათავსებენ. ავარიული მრავალბინიანი საცხოვრებელი სახლების ჩანაცვლების წესი ეხება თბილისში არსებულ ყველა იმ შენობა-ნაგებობას, რომელთა ავარიულობის ხარისხიც მიეკუთვნება III, IV ან V კატეგორიას ანუ ისეთი დაზიანებულია, რომ მასში ცხოვრება საფრთხის შემცველია. ამგვარ შენობებში მცხოვრებლებს ქალაქმა შეიძლება შესთავაზოს საცხოვრებლად გადასვლა ახალ შენობაში, რომელიც შესაძლოა, იმავე ტერიტორიაზე აშენდეს, სადაც ავარიული სახლი იდგა ან – მის სიახლოვეს. ახალ შენობაში ბინის პატრონი მიიღებს მხოლოდ იმხელა ფართის ბინას, რამხელაც იყო მის საკუთრებაში არსებული საცხოვრებელი ფართობი: სხვენები, სარდაფები და ავტოფარეხები გათვალისწინებული არ იქნება.

მომხდარ ფაქტზე გამოძიება დაიწყო სისხლის სამართლის კოდექსის 240-ე მუხლით, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ნიშნავს და ისჯება ჯარიმით ან 2 წლამდე გამასწორებელი სამუშაოთი, ანდა თავისუფლების აღკვეთით ორ წლამდე.

kvirispalitra.ge