თორნიკე რიჟვაძე თურქეთში გადაიყვანეს სამკურნალოდ.
აჭარაში „ქართული ოცნების“ მთავრობის ყოფილი მეთაური, თორნიკე რიჟვაძე, – რომელმაც ორიოდე დღის წინ, ოფიციალური ვერსიით, თვითმკვლელობა სცადა, – სამკურნალოდ თურქეთში გადაიყვანეს.
- რიჟვაძე თავდაპირველად, 7 ივლისს, მიიყვანეს საგარეჯოს „ჯეოჰოსპიტალსში“, სადაც გადაუდებელი დახმარება გაუწიეს;
- იქიდან თბილისში, პირველ საუნივერსიტეტო კლინიკაში, თბილისიდან კი თურქეთში გადაიყვანეს.
მისი თურქეთის კლინიკაში გადაყვანის შესახებ ინფორმაცია მედიას 9 ივლისს, დილით დაუდასტურა ლალი ტურძელაძემ, პირველი საუნივერსიტეტო კლინიკის კლინიკურმა დირექტორმა.
„თორნიკე იყო აბსოლუტურად სტაბილურ მდგომარეობაში, შეღვიძებისას კონტაქტში შემოდიოდა, გაუმჯობესებული პარამეტრებით – თუმცა მართვის სუნთქვაზე დავტოვეთ, ვინაიდან გადაყვანა უნდოდათ და არ შეიძლება მისი მოხსნა საჰაერო ფრენის დროს. რა თქმა უნდა, მძიმე პაციენტია, აპარატულ სუნთქვაზე, მაგრამ იყო გაუმჯობესებული პარამეტრებით აბსოლუტურად კონტაქტური. აბსოლუტურად ოჯახის მოთხოვნით გადავიყვანეთ. არც ლევანმა [რატიანმა] და არც ბატონმა პრემიერმა [ირაკლი კობახიძე] იმიტომ არ თქვეს, რომ ჩამოყალიბებული არ იყო ოჯახი და მოგვიანებით ჩამოყალიბდნენ. თურქეთმა ჩაიბარა სტაბილურად – სხვანაირად არ წაიყვანდნენ, რადგან უნდა ეფრინათ. აბსოლუტურად სტაბილური პარამეტრებით – პირიქით ბევრად გაუმჯობესებული წაიყვანეს“, – უთხრა ლალი ტურძელაძემ ჟურნალისტებს პირველ საუნივერსიტეტო კლინიკასთან.
წინა საღამოს, 8 ივლისს პირველი საუნივერსიტეტო კლინიკის დირექტორმა ლევან რატიანმა განაცხადა, რომ რიჟვაძეს „დადებითი დინამიკა“ ჰქონდა და თქვა: „კონტაქტურია, ადეკვატურია, ასრულებს მარტივ დავალებებს“.