30 მაისს უმძიმესი ავტოსაგზაო შემთხვევა თერჯოლის მუნიციპალიტეტის სოფელ ნახშირღელეში მსხვერპლით დასრულდა. როგორც ირკვევა, ავტომობილი ხეს შეეჯახა, რის შედეგადაც ორი ადამიანი ადგილზე დაიღუპა.
შემთხვევის ადგილზე მისულ სასწრაფოს ბრიგადას და სამართალდამცავებს მანქანაში მყოფი ორი მგზავრი გარდაცვლილი დახვდა. ცნობილია ერთ-ერთი გარდაცვლილი ახალგაზრდას ვინაობა, ის ტყიბულის სოფელ ცუცხვათში მცხოვრები 24 წლის მეგი კუპრაშვილია.
არსებული ინფორმაციით, სამწუხაროდ ავარიის მიზეზი გადაჭარბებული სიჩქარეა. როგორც ირკვევა, სწრაფად მოძრავი ავტომანქანის მძღოლმა საჭე ვერ დაიმორჩილა და ხეს შეეჯახა,
როგორც “კვირის პალიტრასთან” მეგის მეგობარი ამბობს, გოგონა 24 წლის იყო. ის ქუთაისის ერთ-ერთ კლინიკაში მედდად მუშაობდა და ყველას ძალიან უყვარდა.
“ძალიან განვიცდი ამ დიდ ტრაგედიას. მე და მეგი თანამშრომლები ვიყავით. ქუთაისის საეკლესიო საავადმყოფოში ერთად ვმუშაობდით. მე რეანიმაციის მედდა, ის თერაპიის განყოფილების მედდა იყო. კოვიდის პერიოდიდან მოყოლებული საოცარი ურთიერთობა ჩამოგვიყალიბდა. მართლა რთული პერიოდი გამოვიარეთ მაშინ. მეგი გამორჩეული, სასწაული, მშვიდი, ყურადღებიანი, ზრდილობიანი გოგონა იყო.
იმდენად კარგი ადამიანი იყო, თუ რამე არსებობს ამქვეყნად და იმქვეყნად იმედია სამოთხეში იქნება. ძალიან სამწუხაროა ასეთი ახალგაზრდა, სიცოცხლით სავსე ადამიანის გარდაცვალება. სამი წელი ვიმუშავეთ ერთად.
28 მაისს ვნახე მეგი ბოლოს, ბიძა მყავდა მიყვანილი კლინიკაში. რას წარმოვიდგენდი რომ ეს ჩვენი ბოლო შეხვედრა იქნებოდა. სულ რაღაც 24 წლის იყო, სიცოცხლით სავსე, წინ ჰქონდა მომავალი და ასეთი უბედურება დატრიალდა.
როგორც ვიცი, მასთან ერთად კიდევ ერთი ახალგაზრდაა გარდაცვლილი, მისი დედა ემიგრაციაში ყოფილა, არ იცის ჯერ ეს თავზარდამცემი ამბავი და ამიტომ მისი ვინაობა არ ხმაურდება. ადგილზეა ორივე გარდაცვლილი. მეგი ტყიბულის სოფელ ცუცხვათიდან იყო, ექსპერტიზის შემდეგ მისი ცხედარი იქ გადასვენეს. ვუსამძიმრებ მათ ოჯახებს, მათ სამეგობროს და ყველას ამ დიდ ტრაგედიას”, – განაცხადა მეგი კუპრაშვილის მეგობარმა ნანო ნიკურაძემ.
კვირის პალიტრა
user1