·
წალკის სოფელ საყდრიონის საბავშვო ბაღში ბავშვების მიმართ შესაძლო ძალადობის შესახებ ორმა მშობელმა პოლიციას განცხადებით მიმართა | ინფორმაციას ამის შესახებ ადგილობრივი მედია TOK2REGIONS ავრცელებს. ერთ-ერთი ბავშვის მშობელმა, ლია ჩოგაძემ რედაქციას ინტერვიუ უშუალოდ სამმართველოს შენობიდან მისცა.
“ბავშვების ნაამბობის შესაბამისად მოვიქეცით, განვაცხადეთ შესაბამის ორგანოებში ასეთი განცხადება, რომ საბავშვო ბაღში მოხდა ხელით შეხება ბავშვზე, ხდება ბავშვებზე ძილის დროს ბალიშების დაფარება თავზე და ისე დაძინება, დასჯის მეთოდების გამოყენება კუთხეში დაყენებით და ბავშვების იზოლირებით, რომ სხვამ აღარ ეთამაშოს, გაირიოს და ა.შ. ამ ყველაფერთან დაკავშირებით განვაცხადეთ ბაღების სააგენტოშიც, მაგრამ ჩვენდა სამწუხაროდ, რეაგირების მაგივრად უკუშეტევაზე წამოვიდნენ” | ამბობს ქალი. მისივე თქმით, დღეს ფსიქოლოგის თანხლებით ბავშვების გამოკითხეს.
ამავე მედიის ცნობით, წალკის ბაღების გაერთიანების ხელმძღვანელმა, მელსიდა მეზიროვამ მათ უთხრა, რომ მომხდარის შესახებ ინფორმაციას ფლობს, მიმდინარეობს გამოძიება და დამატებით დეტალებზე ვერ ისაუბრებს.
უშუალოდ სოფელ საყდრიონის საბავშვო ბაღის აღმზრდელ-მენეჯერი ჟუჟუნა ბერიძე TOK2REGIONS-თან მომხდარს ცილისწამებას უწოდებს და ამბობს, რომ ამ გზით, მისი ადგილის დაკავება სურთ. საბავშვო ბაღში არაა ვიდეოსათვალთვალო კამერები. ამასთან დაკავშირებით ბაღის მენეჯერი ამბობს, რომ სურვილის მიუხედავად კამერები ჯერჯერობით არ აქვთ და გათვალისწინებულია მომავალი წლის ბიუჯეტში.
