ძლიერი წვიმის შედეგად ბათუმში რამდენიმე ქუჩა და საცხოვრებელი სახლის ეზო დაიტბორა.
მოძრაობა შეიზღუდა აღმაშენებლის ქუჩაზე. დატბორილ ტერიტორიებზე მუშაობენ შესაბამისი სამსახურები და ტექნიკა.
მერიის ინფორმაციით, ქალაქის მასშტაბით არსებული სანიაღვრე ქსელი და სატუმბი სადგურები გამართულად მუშაობს და გამტარუნარიანია.
დატბორვასთან დაკავშირებით ცხელ ხაზზე ათობით შეტყობინებაა შესული.
„ბათუმის წყლის“ გენერალური დირექტორის ალექსანდრე მჟავანაძის განცხადებით, ზღვაში შემსვლელ არხებზე სპეციალური ტექნიკა მუშაობს. ასევე გამართულად მოქმედებს სანიაღვრე-სატუმბი სადგური.
„სტიქიურად მოსულმა უხვმა ნალექმა რამდენიმე ადგილზე პრობლემები შექმნა. დატბორილია როგორც რამდენიმე ქუჩა, ასევე კომერციული ფართი. დაახლოებით 30-მდე ზარია ცხელ ხაზზე შესული. სრულად მობილიზებულია „ბათუმის წყლის“ როგორც ადამიანური რესურსი, ასევე სპეციალური ტექნიკა და ამომტუმბავი მანქანები ყველა იმ ადგილას, სადაც ამის საჭიროებაა“, – განაცხადა მჟავანაძემ.
пользователь 