13 სექტემბერს, საღამოს, მცხეთის მუნიციპალიტეტში მომხდარ ავტოსაგზაო შემთხვევას ორი ახალგაზრდა გოგონას სიცოცხლე ემსხვერპლა. მანქანაში მყოფი სამი ადამიანი კი დაშავდა. არსებული ინფორმაციით, ავტომობილი გზის სავალი ნაწილიდან გადავიდა და თხრილში ჩავარდა. ავარიის შედეგად ადგილზე დაიღუპნენ ნათია კვინტრაძე და მარიამ იმერლიშვილი, სამი დაშავებული კი კლინიკებშია გადაყვანილი.
გოგონები ქორწილში იყვნენ და იქიდან სახლში ბრუნდებოდნენ, როცა ეს საშინელი ავარია მოხდა. დაღუპულები ერთმანეთის მეგობრები არიან. კონკრეტულად რა გახდა ამ ტრაგედიის მიზეზი, ამას სამართალდამცავები დაადგენენ.
“წეროვნის დასახლებასთან, დიდ ტრიალ მინდორზე არის რესტორანი “შუაგული”. როგორც ვიცი, იქ იყვნენ და თბილისში ბრუნდებოდნენ. ძალიან მიხვეულ-მოხვეული გზებია. ზუსტად რა მოხდა, არ ვიცით. შესაძლოა, გზა აებნათ და მანქანა თხრილში გადავარდა. ვინც საჭესთან იჯდა, ისიც დაიღუპა. ქორწილიდან მოდიოდნენ, მხიარულება გლოვად და უბედურებად იქცა”, – ამბობს გარდაცვლილების ერთ-ერთი ახლობელი.
“კვირის პალიტრა” მარიამ იმერლიშვილის თანაკლასელ გოგონას დაუკავშირდა.
“სკოლა 2004 წელს დავამთავრეთ. მას შემდეგ არ მყავდა ნანახი. 2 წლის წინ შემხვდა თიანეთში, თიანეთობაზე. ისევ ისეთი ბედნიერი, სიცოცხლითა და დადებითი ემოციებით სავსე იყო. თითქოს მთელი ის დრო არც იყო გასული და მარი ისევ ის მარი იყო, მე ისევ ის ანა ვიყავი. თითქოს ამ მრავალ წელს ჩვენს შორის არც კი გაუვლია, თითქოს ისევ ის სკოლის მოსწავლე, გიჟი და ცელქი გოგოები ვიყავით. გავიხსენეთ კლასელები, მოვიკითხეთ ყველა, ვინმესთან თუ რამე წვდომა გვქონდა, ის ისეთი მხიარული, ლამაზი, კეთილი, სიცოცხლით სავსე იყო, ენერგიით აბრდღვიალებული თვალებით, ზუსტად ისევ ისე, როგორც სკოლაში – უბრალოდ მოუსვენარი გოგონები. გული მაქვს ჩაწყვეტილი”, – გვითხრა მისმა თანაკლასელმა გოგონამ, ანა ხუციშვილმა.
“კვირის პალიტრა”
