“კადრებში ჩანს, უკან წითელი მანქანა რომ არის, ეს არის რეზო ელიზბარაშვილის ცოლის მანქანა, რომლის ბიძა მართავდა და გამოეკიდნენ, ბავშვები ჩასვეს მანქანაში და ეს ოჯახი გამოეკიდა… როგორც თვითმხილველები ამბობენ, საჭესთან მისი შვილი იჯდა მცირეწლოვანი, თვითონ იბრალებს, არ მჯდარა და დედა იმიტომ გამოეკიდა, რომ არასრულწლოვანი დასვა მანქანაში და აი, ბავშვმა ასეთი რაღაც გააკეთა. ის ბავშვები რომ გადმოხტნენ მანქანიდან, ჩანს კიდეც კადრებში, რომ დედის მანქანისკენ გარბიან ორივენი. ასევე იმდენად დიდი იყო დაჯახების სიმძლავრე, რომ რამდენიმე მეტრში გადააგდო, ფაქტობრივად, ანა უკვე მკვდარი იყო და მართაც მკვდარი იყო, იმიტომ, რომ ერთ-ერთმა გამვლელმა მაისური გაიხადა და თავქვეშ ამოუდო ბავშვს…” | ამბობს გორში დაღუპული დედა-შვილის ოჯახის ახლობელი, ირმა ამბარდნიშვილი TV პირველთან საუბრისას
გორში, ჭავჭავაძის ქუჩაზე, ქვეითად მიმავალ ახალგაზრდა ქალსა და მის მცირეწლოვან შვილს ავტომობილი 13 ივლისს საღამოს შეეჯახა. ქალი კლინიკაში გადაყვანის შემდეგ მალევე გარდაიცვალა, 3 წლამდე ბავშვი კი მეორე დღეს დაიღუპა. ავტომობილის მძღოლი, რევაზ ელიზბარაშვილი შემთხვევის დღესვე დააკავეს. გორის რაიონულმა სასამართლომ მას აღკვეთის ღონისძიების სახით პატიმრობა 15 ივლისს შეუფარდა. დაკავებულს ბრალდება საქართველოს სისხლის სამართლის კოდექსის 276-ე მუხლის მე-9 ნაწილით (ალკოჰოლის ზემოქმედების ქვეშ, ავტომობილის მოძრაობის უსაფრთხოების წესის დარღვევა, რამაც ორი ადამიანის სიცოცხლის მოსპობა გამოიწვია) წარედგინა, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს. დაღუპულების ოჯახის ახლობლები მუხლის გადაკვალიფიცირებას ითხოვენ და შსს-ს მიმართავენ: “სატრანსპორტო წესების დარღვევის” მუხლით რომ აღძარით საქმე შსს, გგონიათ შევარჩენთ? 109-ე მუხლით უნდა დაიწყოს ძიება! ორი უდანაშაულო ადამიანი მოკლა! დიახ, განზრახ მოკლა! თან ნარკოტიკი რომ მოიხმარა და თან ფეხზე ვერ დგებოდა პოლიციაში რომ მიათრიეს ეგ გარეწარი! 16 წთ-ში 3 ჯარიმა რომ დაეწერა, პატრულმა რატომ არ დააკავა?…”
