“ჩემი გაზრდილია, არ გამიზრდია იმ სულისკვეთებით, რომ ვიღაცას რაღაც დაუშავოს” – ამის შესახებ “ქართლის ამბებთან” გორში, პოლიციელის მიერ ნაცემი პაპუნა ლოცულაშვილის მამიდამ – ლია ლოცულაშვილმა განაცხადა.
პაპუნა ლოცულაშვილი, რომელზეც გორში სამართალდამცავებმა ფიზიკურად იძალადეს, გაათავისუფლეს. ამის შესახებ “ინტერპრესნიუს“ მისმა ადვოკატმა, ლაშა ტყეშელაძემ განუცხადა.
ადვოკატის თქმთ, სამართალდამცველებმა მას მიაწოდეს ინფორმაცია, რომ დაკავებული გათავისუფლდა და ექსპერტიზაზე გადაჰყავთ.
“ზეპირად მითხრეს, რომ გავათავისუფლეთ და ექსპერტიზაზე გადაგვყავსო. დოკუმენტებით არ მინახავს, ექსპერტიზის შემდეგ, გახდება დამატებით ცნობილი. ამ ეტაპზე, მითხრეს, რომ გაათავისუფლეს”, – განაცხადა ადვოკატმა.
მისთვის უცნობია, რის საფუძველზე მოხდა გათავისუფლება, თუმცა აღნიშნა, რომ ინფორმაცია მიაწოდეს, როგორც იზოლატორიდან, ასევე, სამართალდამცველებმა.
მანამდე ცნობილი გახდა, რომ მამაკაცი 353-ე მუხლით იყო დაკავებული, რაც გულისხმობს პოლიციის მუშაკების მიმართ წინააღმდეგობის გაწევას, მათი საქმიანობის შეწყვეტის მიზნით, ძალადობის მუქარით.
ცნობისთვის, გორში, ე.წ. კომბინატის დასახლებაში ორ პირს სამართალდამცავთა ჯგუფი ფიზიკურად დღეს გაუსწორდა. აღნიშნულის ამსახველ კადრებს სოციალურ ქსელში „ქართლის ამბები“ ავრცელებს. თავის მხრივ, პროკურატურამ პოლიციელების მხრიდან ძალადობით უფლებამოსილების სავარაუდო გადამეტების ფაქტზე გამოძიება დაიწყო.
пользователь