“პროკურატურამ დადო გარკვეული ფაქტები და მე არ მაქვს უფლება, რომ ვთქვა, ის [ბუსა ჟვანია] არ ყოფილა დამნაშავე-მეთქი. გვითხრეს, რომ ის არის დამნაშავე და ორგანიზატორი ამ მკვლელობის. [რატომ უარყოფს ნინო ქადაგიძე მისი შვილის კავშირს ნიკო კვარაცხელიას მკვლელობასთან] ვერ გეტყვით, ის დედაა და ალბათ, ძალიან სტკივა. თქვენ წარმოგიდგენიათ, რამხელა ბოროტებაზეა საუბარი, როდესაც ადამიანსაც კი არ იცნობ შენ და აორგანიზებ მის მკვლელობას“, – ასე ეხმაურება „პალიტრანიუსთან“ მოკლული ნიკო კვარაცხელიას დედა, იზა ომაძე, ყოფილი პრემიერ-მინისტრის, ზურაბ ჟვანიას მეუღლის, ნინო ქადაგიძის კომენტარს, რომ მისმა შვილმა, ბუსა ჟვანიამ ნიკო კვარაცხელიას მკვლელობის დაგეგმვის შესახებ არაფერი იცოდა.
- როგორც იზა ომაძემ აღნიშნა, მისი შვილის მკვლელობის საქმეზე ბრძოლას გააგრძელებს და საზოგადოებას არგუმენტებით მოუყვება, თუ ვინ შეიძლება ყოფილიყო დამკვეთი.
„პროკურატურის ბრიფინგით დღეს შევიტყვეთ, რომ ნიკოს საქმე არის გახსნილი, მაგრამ მე, დედამ, შემიძლია გითხრათ, რომ ეს საქმე არის გახსნილი გარკვეულ დონემდე. ეს საქმე მე აუცილებლად უნდა მივიყვანო ბოლომდე და დავასახელო, ვინ დაუკვეთა ნიკოს მკვლელობა – ეს იყო შეკვეთით მკვლელობა და შეკვეთილი მოტივით მკვლელობა. ჯერ ბავშვი ცოცხალი იყო, როდესაც იქ მდგომმა ადამიანებმა მოტივზე დაიწყეს საუბარი. მეორე დღესვე, ტაქსის მძღოლმა, რომელმაც მკვლელები წაიყვანა გარკვეულ მისამართზე, მოისმინა გარკვეული საუბრები, ეს საუბრები მოახსენა გამოძიებას, მაგრამ არანაირი სურვილი არ გამოუჩენია გამოძიებას, რომ თავის დროზე სწორ კვალზე გასულიყო, მიუხედავად იმისა, რომ ეს სახელები პირველივე წუთებიდან ჟღერდებოდა. დაკითხვაზეც ამბობდნენ, რომ ძალიან უჭირდათ მათი დაკითხვა.
ძალიან ცუდი ფაქტია, მაგრამ პროკურატურამ დადო გარკვეული ფაქტები. მე არაფერს ვამბობ, მე არავის არაფერს ვაბრალებ, მაგრამ პროკურატურამ დადო გარკვეული ფაქტები და მე არ მაქვს უფლება, რომ ვთქვა, ის არ ყოფილა დამნაშავე-მეთქი. ეს არის პროკურატურის და გამოძიების ნამუშევარი და მათ გვითხრეს, რომ ის [ბუსა ჟვანია] არის დამნაშავე და ორგანიზატორი ამ მკვლელობის. ეს პროკურატურისგან გავიგეთ. [რატომ უარყოფს ნინო ქადაგიძე მისი შვილის კავშირს ნიკო კვარაცხელიას მკვლელობასთან] ამას ვერ გეტყვით, ის დედაა და ალბათ, ძალიან სტკივა. თქვენ წარმოგიდგენიათ, რამხელა ბოროტებაზეა საუბარი, როდესაც ადამიანსაც კი არ იცნობ შენ და აორგანიზებ მის მკვლელობას ან რა შეხება უნდა ჰქონოდა? ძალიან აირ-დაირია თვითონ ეს ბრალი. ყველაფერი აიწეწა-დაიწეწა და ცოტა ძნელია თავის დადგმა, რომ მოტივს ერთს ამბობენ და ამ მოტივთან, რა მეგობრობა, რა შეხება უნდა ჰქონოდა მას. გავაგრძელებ ბრძოლას, სახელებით და გვარებით, არგუმენტებით ყველაფერს მოვუყვები საზოგადოებას, თუ ვინ შეიძლება ყოფილიყო დამკვეთი, როგორ მოხდა და როგორ დაიგეგმა ეს ყველაფერი“, – განაცხადა იზა ომაძემ.
- მისი განმარტებით, აპირებს ისაუბროს იმ ადამიანების სახელებსა და გვარებზე,რომლებმაც საქმის ობიექტურ და სწრაფ გამოძიებას ხელი შეუშალეს.
„აუცილებლად, მეტსაც გეტყვით, ეს ადამიანები, ზოგიერთი მათგანი გარკვეულწილად, შეიძლება თანამონაწილეც და თავად დამგეგმავიც არის. ყველას სახელს და გვარს აუცილებლად გავაჟღერებ და ყველაფერს ვიტყვი“, – განაცხადა იზა ომაძემ.
ცნობისთვის, თბილისის პროკურორის, გიორგი მიქაიას განცხადებით, საქართველოს პროკურატურამ ნიკო კვარაცხელიას მკვლელობის საქმე გახსნა. მისი თქმით, პროკურატურა ნიკო კვარაცხელიას შეკვეთით, ჯგუფურად განზრახ მკვლელობის ორგანიზების ფაქტზე გურამ კაკულიას, დავით კაკულიას და ბესარიონ ჟვანიას ბრალდებას წარუდგენს. ყოფილი პრემიერ-მინისტრის, ზურაბ ჟვანიას შვილზე, ბესარიონ (ბუსა) ჟვანიაზე კანონით დადგენილი წესით გამოცხადდება ძებნა.
პროკურატურის ცნობით, გურამ და დავით კაკულიებმა ნიკოლოზ კვარაცხელიას შეკვეთით მკვლელობის განზრახვა მათ მეგობარს ბესარიონ ჟვანიას გაანდეს და შეთანხმდნენ მოეხდინათ ნიკოლოზ კვარაცხელიას მკვლელობის ორგანიზება. ბესარიონ ჟვანიამ დაიწყო დანაშაულის ამსრულებლის მოძიება, რა მიზნითაც იგი მის ნაცნობებს ალეკო ჭელიძეს და გიორგი კავილაძეს დაუკავშირდა, შესთავაზა მათ ძმები კაკულიების შეკვეთით მოეხდინათ ნიკოლოზ კვარაცხელიას ჯგუფური მკვლელობა, რაზედაც ისინი დათანხმდნენ. ალეკო ჭელიძე და გიორგი კავილაძე ბესარიონ ჟვანიას ორგანიზებით, 2021 წლის ივლისსა და აგვისტოში სომხეთის რესპუბლიკაში რამდენჯერმე გაემგზავრნენ ამავე ქვეყანაში მყოფი მკვლელობის შემკვეთებთან გურამ და დავით კაკულიებთან შესახვედრად, სადაც ისინი მკვლელობის ორგანიზებისათვის აუცილებელ მითითებებს გასცემდნენ.
- თავის მხრივ, პროკურატურის მიერ გავრცელებულ ინფორმაციას „ინტერპრესნიუსთან“ გამოეხმაურა ზურაბ ჟვანიას მეუღლე, ნინო ჟვანია. ის აცხადებს, რომ მის შვილის მიმართ პროკურატურის მიერ გაჟღერებული ბრალდება მიუღებელია.
„ეს ბრალდება სრულიად მიუღებელია, გამოვრიცხავ, რომ რამე იცოდა ბუსამ. [მკვლელობას რომ გეგმავდნენ და] ეს რომ სცოდნოდა ბუსას, ამას გამოვრიცხავ. ერთი, უბედურება, რაც მოხდა, ტრაგედია არის ჩვენთვის ყველასთვის და ახლა მეორე – ადამიანს, რომელმაც არ იცოდა, დააბრალო და ასეთი ბრალდება წაუყენო, ეს კიდევ მეორე ტრაგედიაა, მე მგონი“, – განაცხადა ნინო ჟვანიამ.