მცხეთის რაიონის სოფელ მუხრანის ცენტრში ორი ადამიანი ჩაცხრილეს. უმძიმესი დანაშაული დღეს, დაახლოებით საღამოს 18:00 საათზე, ხალხმრავალ ადგილას მოხდა. მოკლულები არიან მუხრანის მაცხოვრებლები ზურა სანამაშვილი და გია ქილარჯიანი. ისინი დამნაშავემ მანქანასთან ჩაცხრილა, რის შემდეგ შემთხვევის ადგილიდან მიიმალა. სამართალდამცველების ამ დრომდე ეძებენ დამნაშავეს, ჯერჯერობთ უცნობია, რა გახდა ამ უმძიმესი დანაშაულის მიზეზი.
ერთ-ერთი ვერსიით, მომხდარი ძველ დაპირისპირებას და შურისძიებას უკავშირდება. როგორც ცნობილია, მომხდარზე დაწყებულია გამოძიება ორი მუხლით, 109-ე და 236-ე, რაც დამამძიმებელ გარემოებაში განზრახ მკვლელობას და ცეცხლსასროლი იარაღის და საბრძოლო მასალის მართლსაწინააღმდეგო ტარებას გულისხმობს. მკვლელობის ადგილზე საგამოძიებო მოქმედებები ამ დრომდე მიმდინარეობს. პოლიცია აკონტროლებს მუხრანში შესასვლელ გზასაც.
როგორც “კვირის პალიტრისთვის” გახდა ცნობილი, ცეცხლსასროლი იარაღიდან დამნაშავემ სამჯერ გაისროლა, მიყენებული ჭრილობით ადგილზე დაიღუპა გია ქილარჯიანი, ხოლო ზურა სანამაშვილი ჯერ კიდევ ცოცხალი იყო, როცა სასწრაფოს მანქანით გადაიყვანეს, მაგრამ სამწუხაროდ, ის გზაში, კლინიკაში მიყვანამდე გარდაიცვალა. ტრაგედიის ადგილას კამერებია დამონტაჟებული და სავარაუდოდ, დამნაშავეების ვინაობის დადგენა სამართალდამცავებს არ გაუჭირდებათ.
ზურა სამანაშვილს მუხრანში, ყველა იცნობდა. სავარაუდოდ სამანაშვილი და ქილარჯიანი გადმოვიდნენ და სწორედ ამ დროს ესროლეს.
“ზურა სამანაშვილს ბავშვობიდან ვიცნობ. დაოჯახებულია, ჰყავს მეუღლე და ქალ-ვაჟი. მიშა სააკაშვილის პრეზიდენტობის დროს ხშირად იყო საზღვარგარეთ, ჯერ რუსეთში, მერე საფრანგეთში. როგორც ვიცი, ბოლო წლები საქართველოში ცხოვრობდა. სულ მუხრანში ტრიალებდა. აქ ყველა პატივს სცემს, ყველას უყვარს. ტრაგედიის ადგილას რომ მივედი, ექვსი საათი ხდებოდა და დანაშაული უკვე მომხდარი იყო. სასწრაფო და პოლიცია მოსული იყო. ზურას სვამდნენ სასწრაფოს მანქანაში…. პირჯვარი გადავსახე მანქანას, ბევრი ვეხვეწე უფალს, რომ ღმერთო, გადაარჩინე – მეთქი, მაგრამ… ამბობენ ტყვია თავის არეში ჰქონდა მოხვედრილიო.
უკან, შემთხვევის ადგილზე რომ მივბრუნდი, იქვე ესვენა მეორე მოკლული, ის ადგილზე იყო გარდაცვლილი, ძირს იწვა სისხლის გუბეში, იმ ბიჭს, გიას, მე არ ვიცნობდი. როგორც თვითმხილველები ამბობენ, იმ ბიჭს ორი ტყვია ჰქონდა მოხვედრილი…
სოფლის ცენტრშია ეს დანაშაული მომხდარი, ამბობენ სამი გასროლა იყოო. არასოდეს დამავიწყდება ეს ეს უმძიმესი კადრები.
როგორც მითხრეს, დამნაშავეები მანქანით ძალისის მხარეს გაიქცაო. მეტი არაფერი ვიცი. ვინ ესროლა, რატომ ესროლა”,- ამბობს ჩვენთან საუბარში ადგილობრივი.
მისი თქმით, ზურა სამანაშვილს ოცი წლის წინ მამა მოუკლეს.
“მამა მოუკლა მამიდის ქმარმა, ზურა თვითონ იყო მოჭიდავე, ბავშვებს ავარჯიშებდა…. ამ ამბის მერე შეიცვალა მისი ცხოვრება. მამიდის ქმარმა მამა მოუკლა. ოჯახს ჰყავდა ავტობუსი. ერთ დღეს, გამოიარა ავტობუსით ზურამ და ხედავს რომ თავის მამიდას ქმარი სცემს. ზურა მანქანიდან გადავიდა ამ კაცს სცემას. როგორც ჩანს, ამ კაცმა გულში ჩაიდო ეს წყენა და გარკვეული დროის შემდეგ, ამ გზაზე რეისიდან მომავალ მამა-შვილს შეხვდა. ზურას მოსაკლავად მოიქნია დანა მამიდის ქმარმა…ზურას მამა თავის შვილს გადაეფარა და მას დანა პირდაპირ გულში მოხვდა და ადგილზე დაიღუპა. ის მკვლელი კი დაისაჯა, მაგრამ ამ ფაქტმა შეცვალა ზურას ცხოვრება….
ზურას ნასამართლეობა მე არ გამიგია, მაგრამ საქმეებს არჩევდა, როგორც ვიცი..” -, ამბობს ჩვენთან საუბარში ადგილობირივი და ამბობს, რომ ეს ყველაფერი “მხედრიონის” დროს ახსენებს.
“მუხრანს ზურა ძალიან უყვარდა, ვფიქრობ, ახლა შურისძიება დაიწყება. ღმერთმა ქნას, რომ არ მოყვეს ამას გაგრძელება. დამნაშავე იმედია გამოვლინდება და საკადრისად დაისჯება”, – ამბობს ჩვენთან საუბარში ადგილობრივი.