მექსიკაში 6,5 მაგნიტუდის მიწისძვრას სულ მცირე ორი ადამიანი ემსხვერპლა. მიწისძვრის ეპიცენტრი გერეროს შტატში მდებარეობდა. ინფორმაციას Deutche Welle ავრცელებს.
დაღუპულები 60 წლის კაცი და 50 წლის ქალია. მიწისქვეშა ბიძგები მექსიკის ცენტრში და სამხრეთ ნაწილში იგრძნობოდა.
გერეროს შტატის მთავარ ქალაქში, ჩილპანსინგოში საავადმყოფოს შენობა დაზიანდა, პაციენტები ევაკუირებულები იყვნენ.
მიწისძვრა მექსიკის დედაქალაქ მეხიკოშიც იგრძნობოდა, მექსიკის პრეზიდენტმა, კლაუდია შეინბაუმმა მიწისძვრის გამო პრესკონფერენცია შეწყვიტა და პრეზიდენტის სასახლიდან მისი ევაკუაცია მოხდა. მოგვიანებით პრესკონფერენცია განახლდა.
მექსიკა წყნარი ოკეანის ე.წ. „ცეცხლის რკალში“ მდებარეობს. ამ რეგიონში განლაგებულია რამდენიმე ტექტონიკური ფილა, ამიტომ ხშირია ვულკანები და მიწისძვრები. მეხიკო გადამშრალი ტბის ადგილას, ფხვიერ ნიადაგზეა აშენებული, ამიტომ მიწისძვრების მიმართ განსაკუთრებით დაუცველია.